Африкански топол бран пристигнува во Македонија: температурите до 35 степени
Пред Македонија е период на значително потопло време, под влијание на умерен топол бран со потекло од Африка. Иако температурите ќе растат, не се очекуваат екстремни горештини, туку стабилно и сончево време, со мал потенцијал за краткотрајни локални нестабилности.
Во следните денови времето ќе биде претежно суво и стабилно, со мала до умерена облачност. Постои можност, но само локално и повремено, за краткотраен пороен дожд.
И во Скопје и околината ќе преовладува слична метеоролошка слика — многу потопло, стабилно и сончево време.
Температурите ќе бидат во пораст, како во утринските, така и во дневните часови. Максималните дневни температури на повеќе места ќе достигнуваат околу 30°C, а на места, особено во Повардарието, ќе надминуваат и 35°C. Во некои случаи, можно е температурите во овој регион да бидат и неколку степени повисоки.
УВ индексот ќе се движи меѓу 7 и 8, што претставува умерено до многу висока вредност, па се препорачува претпазливост при изложување на сонце во најтоплите делови од денот.
