Народниот правобранител отвори предмет поради поплавите во Кичево
Народниот правобранител постапува по службена должност поради сериозните поплави кои го погодиле Кичево, информира заменик-народниот правобранител Илбер Руфати од подрачната канцеларија во градот.
„Според првичните податоци, врз основа на фотодокументација и информации од граѓаните, поплавите зафатиле јавни сообраќајници, станбени објекти и објекти од јавен интерес, вклучително и образовна установа. Оваа состојба претставува директна закана за безбедноста, здравјето и имотот на граѓаните“, информира Руфати.
Првичните индикации упатуваат на можни системски недостатоци во управувањето со атмосферската канализација, системите за одводнување и одржувањето на водотеците, што може да отвори прашање за институционална одговорност доколку се утврди непостапување или небрежност.
Народниот правобранител достави официјално барање до Општина Кичево, Центарот за управување со кризи, Дирекцијата за заштита и спасување и Министерството за животна средина и просторно планирање. Во него се бара итна техничка проценка на причините за поплавите, детално информирање за досега преземените мерки, утврдување на евентуална институционална одговорност и изготвување конкретен акциски план со јасни рокови за санација и превенција.
Регионалната канцеларија Кичево ќе продолжи со интензивен мониторинг на постапувањето на институциите и, доколку се констатира непостапување или повреда на правата на граѓаните, ќе преземе понатамошни мерки согласно закон.
