„Наместо да нѐ поддржуваат, соседите ни ставаат вето за ЕУ“, рече Сиљановска Давкова
Претседателката Гордана Силјановска Давкова денеска се обрати на Годишниот самит на Конкордија во Њујорк, каде го нагласи значењето на проширувањето на Европската унија како услов за зачувување на мирот и стабилноста на континентот.
„Она што Обединетите нации се за светот, тоа Европската унија е за Европа – мултилатерален проект со врвна цел: мир. Тој се постигнува преку проширување, врз основа на Копенхагенските критериуми – демократија, владеење на правото, човекови права и пазарна економија“, изјави Силјановска Давкова.
Таа предупреди дека ЕУ не може да биде глобален бранител на мултилатерализмот ако не го почитува на сопствениот континент. „Проширувањето не е техничко прашање, туку тест дали ЕУ ќе избере пат на согласност или на поделби – дали ќе биде Унија на правила и стандарди, или Унија на двојни стандарди и контрадикции,“ рече претседателката.
Во своето излагање таа ја потенцираше и потребата од поголема регионална солидарност меѓу земјите од Западен Балкан.
„Ако сакаме да бидеме дел од ЕУ, мора да се поддржуваме меѓусебно. Како можеме да очекуваме разбирање од Унијата, ако не се разбираме меѓу себе? Шведска, Данска и Норвешка го направија тоа за балтичките земји – нивната поддршка беше апсолутна и резултатите се видливи. За жал, кај нас често гледаме блокади и вета. А за членство е потребен консензус – доволно е една земја да се противи и процесот застанува“, нагласи Силјановска Давкова.
