На Васко Ковачевски ќе му се суди во отсуство
По предлог на Јавниот обвинител, судот донесе решение на обвинетиот Васко Ковачевски да му се суди во отсуство, бидејќи е недостапен за органите на прогонот.
„Постојат важни причини да му се суди“, рече судијката.
Случајот „Адитив“ е еден од најголемите случаи поврзани со злоупотреби во јавните набавки во енергетскиот сектор во Северна Македонија. Според обвинителниот акт, истрагата се однесува на периодот од април до август 2023 година, кога група од високи службени лица и приватни бизнисмени наводно формирале организирана група со цел извршување на серија кривични дела. Обвинителството ги товари за злоупотреба на постапката за јавен повик и доделување договори за јавна набавка, злоупотреба на службена положба и перење пари.
Фокусот на истрагата е тендерот за набавка на адитиви за јаглен (адитив RPT 601) за потребите на државната компанија АД ЕСМ, поточно нејзините подружници РЕК Битола и РЕК Осломеј. Обвинетите, меѓу кои и управители и сопственици на неколку правни лица, преку фиктивни пререгистрации на дејности и однапред договорени понуди, ја манипулирале тендерската постапка. На тој начин, според обвинителството, овозможиле еден правен субјект да добие договор вреден речиси 398 милиони денари и да се стекне со противправна имотна корист.
Дополнително, дел од обвинетите, со цел да го прикријат потеклото на средствата, спровеле низа трансакции со кои пуштиле во оптек и подигнале готовина во вредност од над 414 милиони денари. Токму поради овие активности, тие се товарат и за перење пари и други приноси од казниво дело.
Во овој обемен предмет обвинети се 31 физичко и 5 правни лица. Судењето се одвива во дигитална судница во КПУ Идризово, што претставува новина во судската пракса за вакви обемни предмети.
