МВР со дронови ќе ја надгледува безбедноста на изборите: Полицијата најавува засилено присуство околу гласачките места
Министерството за внатрешни работи најави дека ќе ја гарантира целосната безбедност на граѓаните за време на претстојните локални избори, ангажирајќи ги сите свои капацитети, вклучително и современа технологија како дронови за воздушен надзор. Целта е да се обезбеди непречено и безбедно спроведување на изборниот процес.
Според плановите на МВР, на денот на изборите, полициските службеници ќе бидат распоредени во близина на сите избирачки места, како и на клучните сообраќајни точки низ државата. Ова се прави со цел да се зголеми ефикасноста и навремено да се откријат и спречат можни нарушувања на јавниот ред и мир.
„Безбедноста на граѓаните ќе биде гарантирана со стандардните материјално технички средства, мобилни тимови и пунктовско работење, а ќе се користи и современа технологија – дронови за воздушна контрола со цел побрза реакција и преземање на соодветни мерки и активности во случај на инциденти“, се вели во соопштението на МВР.
Министерството, исто така, упати апел до сите граѓани и политички партии да придонесат за мирна и демократска атмосфера, да ги почитуваат упатствата на полициските службеници и да се воздржат од какви било активности што би можеле да го нарушат изборниот процес.
Од МВР најавуваат дека во текот на изборниот ден, редовно и соодветно ќе ја информираат јавноста за текот на гласањето и безбедносната состојба.
