Финиш на кампањата: Партиите ги користат последните часови за митинзи и средби со граѓани, на полноќ почнува изборен молк

Денеска е последниот ден од изборната кампања пред првиот круг од локалните избори, закажан за в недела, 19 октомври. Политичките партии, коалициите и независните кандидати го користат денешниот ден за финални митинзи и прес-конференции, по што ноќеска на полноќ стапува на сила 24-часовниот изборен молк, кој ќе трае сè до затворањето на гласачките места.

Владејачката ВМРО-ДПМНЕ и коалицијата ќе одржат завршен централен митинг во Охрид, додека нивниот кандидат за градоначалник на Скопје, Орце Ѓорѓиевски, за денеска најави прес-конференција.

Опозициската СДСМ и коалицијата ќе бидат активни во повеќе општини, со средби со граѓани во Старо Нагоричане, Ранковце, Крива Паланка, Кратово и Куманово.

Движењето ЗНАМ – За Наша Македонија својот завршен митинг ќе го одржи во Куманово, каде што за градоначалник се кандидира лидерот на партијата, Максим Димитриевски.

Партијата Левица за денеска планира низа активности во главниот град. Нивниот кандидат за градоначалник на Скопје, Амар Мециновиќ, ќе пешачи од Ѓорче Петров до Ново Лисиче во рамки на настанот „Скопје пешки“, а ќе одржи и прес-конференција на Плоштадот „Слобода“. Левица ќе организира и изложба насловена „Скопје какво беше – какво е – какво треба да биде“.

Иако кампањата официјално завршува вечерва, за утре (сабота), во тек на изборниот молк, свои прес-конференции најавија независниот кандидат за градоначалник на Скопје, Горан Марковски, и независната кандидатка за општина Центар, Билјана Ивановска, и двајцата поддржани од граѓанската платформа „Независни заедно“.

Кампањата за вториот изборен круг ќе започне в понеделник, 20 октомври, во оние општини каде што нема да биде избран градоначалник во првиот круг.