МРТ отвора врата за нов кадар: се бараат новинари, сниматели, лектори и продуценти
Јавното радиодифузно претпријатие Македонска радио телевизија (МРТ) објави јавен повик за ангажирање нови соработници, со цел унапредување на програмската понуда и зајакнување на човечките ресурси.
Од МРТ ги повикуваат сите заинтересирани лица кои имаат искуство или професионална определба во областа на медиумите да се пријават. Повикот се однесува на новинари, репортери, водители, спикери, лектори, сниматели, техничари, тонци, продуценти, како и на лица со експертиза во други сегменти од продукцијата и емитувањето на програма.
Кандидатите треба да достават своја биографија (CV) на електронската адреса coveckiresursi@mrt.com.mk, со јасно наведени контакт информации. Од јавниот сервис потенцираат дека сите пријавени кандидати ќе имаат можност за разговор во просториите на МРТ.
Условите за евентуален ангажман ќе бидат дефинирани по завршувањето на процесот на селекција, во согласност со потребите и критериумите на институцијата.
Јавниот повик останува отворен на неопределено време, што им дава можност на сите заинтересирани во секој момент да аплицираат и да станат дел од тимот на националниот сервис.
