МОН донесе правилник за стипендирање студенти за изучување на македонскиот јазик
Министерството за образование и наука (МОН) објави нов правилник со кој се уредува начинот на спроведување на конкурсот за стипендирање на студенти за изучување на македонскиот јазик на сите три циклуси на високото образование. Овој правилник е донесен врз основа на член 12, став (8) од Законот за употреба на македонскиот јазик („Службен весник на Република Северна Македонија“ бр. 21/24) и стапува на сила осмиот ден од објавувањето во „Службен весник“.
Според правилникот, кандидатите за стипендирање ќе поднесуваат електронски пријави преку платформата на МОН на адресата https://e-uslugi.mon.gov.mk/. Во прилог на пријавата, потребно е да се прикачи и соодветната документација, која ќе биде утврдена во конкурсот.
Комисиите за избор на кандидати ќе имаат обврска да ги проверат електронските пријави и доставената документација. Потоа, тие ќе изготват конечен список на студентите на кои ќе им биде доделена стипендија. Овој список ќе биде јавно објавен на веб-страницата на Министерството за образование и наука, а кандидатите ќе бидат информирани за резултатите преку електронската платформа.
Министерот за образование и наука, проф. д-р Весна Јаневска, го потпиша правилникот на 15 јануари 2025 година во Скопје, со цел да се поттикне изучувањето и промоцијата на македонскиот јазик преку стипендирање на студентите во рамките на високото образование.
