АЛТА БАНКА ИСПЛАТИ 556 ПЕНЗИОНЕРИ, ЌЕ РАБОТИ ВО ДВЕ СМЕНИ Исплатата на социјална помош започнува од 6 ноември
Вкупно 556 пензионери денеска подигнале средства од своите сметки во „АЛТА банка“ АД Битола, соопшти Народната банка. Станува збор за пензионери кои немаат платежни картички, а исплатата е извршена во филијалата во Битола.
Бројот на исплати бил поголем од првично планираниот, бидејќи банката ги услужила и граѓаните кои не добиле СМС-порака, но самостојно дошле на шалтерите.
„Иако за денеска преку СМС-пораки беа повикани околу 400 граѓани, на шалтерите беа услужени сите граѓани кои немаат оставено телефонски број за контакт, а самостојно дошле да ги подигнат средствата“, се наведува во соопштението.
Пензионерите можеле да подигнат најмногу 20.000 денари, согласно со привремените ограничувања за располагање со средствата во период од две недели.
Народната банка информира дека денеска на сметките во „АЛТА банка“ се префрлени и средствата за социјална помош од Министерството за социјална политика, демографија и млади.
„Со тоа се создадени услови исплатата на средствата за корисниците на социјална помош да започне од утре, 6 ноември“, се наведува во соопштението.
Филијалата во Битола утре ќе работи во 2 смени, а исплатите ќе продолжат и во сабота.
Надлежните очекуваат следната недела да започне исплатата и надвор од Битола, откако ќе завршат неопходните подготовки.
„Очекуваме по извршените подготовки, следната недела да се отворат шалтери и во другите градови“, соопшти Народната банка.
Оттаму додаваат дека продолжуваат активностите за постепено олеснување на пристапот до парите на граѓаните и компаниите.
„Народната банка продолжува со преземање активности за надминување на настанатата состојба и изнаоѓање соодветни решенија за постепено и безбедно олеснување на располагањето со средствата на граѓаните и компаниите“, се наведува во соопштението.
.
Извор: plusinfo.mk
