Мицкоски повика на единство: Обединети, не само што ќе опстанеме, само така и ќе победуваме
Во величествената атмосфера на Црквата Света Софија во Охрид, денеска свечено беше одбележан Денот на сесловенските просветители, Светите Кирил и Методиј, со присуство на високи државни, црковни и академски претставници.
Во своето обраќање пред присутните, претседателот на Владата упати порака за национално единство, духовно достоинство и зајакнување на колективната свест за значењето на делото на светите браќа.
„Овие двајца браќа, благородни по срце и ум, ни го оставија најголемиот подарок — писмото, словото, гласот на нашиот идентитет“, изјави премиерот, нагласувајќи дека нивната мисија не е само дел од историјата, туку е жив мост што ја поврзува минатото со иднината.
Свеченоста, која се одржа во историски значајниот храм кој векови бил седиште на Охридската архиепископија, беше потсетник на духовниот и културниот континуитет на македонскиот народ. Во говорот беше истакнато дека Македонската православна црква, Универзитетот „Св. Кирил и Методиј“ и МАНУ се столбови на идентитетот и треба да се заштитуваат како заедничко национално наследство.
„Секој удар по нашата црква е удар по Македонија, по нашето постоење и битисување“, рече премиерот, повикувајќи на одговорност и грижа за институциите кои го носат идентитетот на нацијата.
Говорникот се осврна и на историските напади врз македонскиот јазик, култура и постоење, посочувајќи ги ракописите на Ѓорѓија Пулевски и Крсте Петков Мисирков како непобитен доказ за постоењето на македонскиот национален идентитет уште во XIX и XX век.
„Ниту една отстапка немаше да биде возможна ако не наидеше на пукнатина во нашите редови“, беше пораката, со апел за внатрешна кохезија и отпор на обидите за негирање на македонскиот идентитет.
Во вториот дел од говорот, премиерот се осврна и на внатрешно-политичките состојби, посочувајќи дека македонското општество мора да покаже зрелост и единство во клучни моменти. Повика на надминување на партиските разлики во интерес на заедничката иднина и искористување на историските можности за интеграција во меѓународните процеси.
„Не барам единство за секое прашање, туку за најважните. Единството не значи да бидеме исти, туку заедно во нашите разлики“, истакна тој, алудирајќи на потребата за градење на заедничка визија за Македонија.
Во заклучок, тој порача дека „времето за Македонија е сега“ и дека политичките лидери имаат обврска да дејствуваат во интерес на народот, кој секојдневно се соочува со економски и социјални предизвици.
Со овој настан, Македонија уште еднаш го потврди значењето на културното и духовното наследство на светите браќа Кирил и Методиј како темел на националниот идентитет, со порака дека нивното дело е живо, а нивниот завет – траен.
