Мицкоски: Националната развојна стратегија е визија за обединување и напредок на Македонија
Премиерот Христијан Мицкоски го отвори првиот состанок на проширениот Управен одбор на Националната развојна стратегија, истакнувајќи дека оваа стратегија ќе биде основа за трансформација на Македонија во следните дваесет години. Според него, документот не е само визија на една влада, туку стратегија за целото општество, која ќе биде заснована на силна економија, енергетска независност и иновации.
„Националната развојна стратегија за периодот 2024-2044 година претставува највисок обединувачки документ кој има за цел да спроведе суштински национални промени и да ја трасира развојната траекторија на земјата. Клучно е сите да бидеме вклучени во овој процес, бидејќи само така ќе постигнеме реални и храбри промени“, изјави Мицкоски.
Премиерот додаде дека стратегијата ќе се базира на неколку клучни приоритети, од кои најважни се економијата и правдата. Со поддршка на реформите во даночната политика и намалување на бирократијата, како и инвестиции во обновливи извори на енергија, Македонија ќе ги зголеми своите економски капацитети.
„Нема успешна држава без силна економија. Ако сакаме да ја градиме иднината, мора да ја зајакнеме економијата“, посочи Мицкоски, нагласувајќи дека зајакнувањето на енергетската независност ќе биде еден од клучните столбови на стратегијата.
Премиерот исто така потенцираше дека инвестициите во образованието, особено во високо образование, се од витално значење за иднината на земјата. Владата работи на нов закон за високо образование, кој ќе обезбеди бесплатен пристап до научни бази на податоци, што ќе помогне во поддршка на научниот напредок и иновациите.
Во текот на обраќањето, Мицкоски ја истакна и потребата за силни реформи во правосудството, како и борбата против корупцијата, која според него, е клучна за обновување на довербата на граѓаните во институциите.
„Нашите цели се јасни: мораме да создадеме ефикасни и праведни институции. Важно е да градиме држава која ќе биде партнер на своите граѓани и на меѓународната заедница“, рече Мицкоски.
Во рамки на стратегијата, Владата најави и серија инвестиции во инфраструктурата, со посебен акцент на патната и железничката мрежа, како и на дигиталната инфраструктура која ќе стане исто толку важна како и физичката инфраструктура.
„Нашата стратешка предност е што сме природна раскрсница на два важни коридори. Модерни патишта, брзи железници и дигитална поврзаност се клучни за нашата иднина“, додаде премиерот.
На крајот, Мицкоски истакна дека спроведувањето на Националната развојна стратегија ќе биде сериозен предизвик, но со меѓуинституционална координација и поддршка од сите партнери, тој верува дека ќе се постигнат значајни резултати на краток и подолг рок.
