Маск демантира наводи за злоупотреба на дрога: „Не земам дроги, Њујорк Тајмс лаже“
Илон Маск, извршен директор на компаниите X, Tesla и SpaceX, синоќа јавно демантираше дека користи дрога, реагирајќи на напис на „Њујорк Тајмс“ кој тврди дека за време на изборната кампања користел кетамин, екстази и халуциногени печурки.
„Да бидам јасен – НЕ земам дроги! ‘Њујорк Тајмс’ лаже. Пред неколку години користев кетамин на рецепт и тоа го имам јавно објавено на X. Од тогаш не сум го земал“, напиша Маск на социјалната мрежа X.
Во написот објавен во петокот, „Њујорк Тајмс“ наведува дека Маск за време на изборната кампања во САД наводно консумирал значителни количини на кетамин – анестетик со стимулативни својства – заедно со екстази и халуциногени супстанции. Извештајот е заснован на приватни пораки и интервјуа со повеќе од десет лица кои го познаваат или соработувале со Маск.
Во минатото, Маск јавно признал дека користел мали дози кетамин за справување со депресивни епизоди, тврдејќи дека тоа му помогнало да биде поефикасен во работата.
Исто така, „Волстрит џурнал“ минатата година објави дека Маск повремено користел лекови, вклучувајќи го и „Амбиен“, седатив за третман на несоница, што предизвикало загриженост кај некои членови на одборот на Tesla.
Маск во петокот поднесе оставка од својата функција во американската администрација поврзана со намалување на федералните трошоци, изјавувајќи дека се повлекува бидејќи ги запоставил своите бизниси.
