Македонија добива нова ИТ компанија: „Рамбл клауд“ на Крис Павловски отвори подружница!
Компанијата „Рамбл клауд“, основана од бизнисменот со македонско потекло, Крис Павловски, отвори подружница во Македонија. Според информациите објавени од „Призма“, фирмата е регистрирана на адреса во центарот на Скопје, а управители се самиот Павловски и неговиот деловен партнер Брандон Александрофф.
Павловски е познат по своите блиски односи со влијателни личности од администрацијата на американскиот претседател Доналд Трамп. Минатото лето, тој дојде во Скопје заедно со Девин Нунес, директор на „Трамп Медиа“, како и со Хауард Лутник, сопственик на инвестициската компанија „Кантор Фицџералд“, кого Трамп неодамна го назначи за секретар за трговија.
Триото бизнисмени беше пречекано од македонскиот државен врв, вклучувајќи го премиерот Христијан Мицкоски и претседателката Гордана Сиљановска-Давкова. На средбите беше разгледана можноста за економска соработка, а беше најавено дека новата компанија ќе има важна улога во развојот на дигиталните услуги и облак технологијата во Македонија.
Отворањето на подружницата на „Рамбл клауд“ во Скопје се очекува да придонесе за зголемување на инвестициите и отворање нови работни места во ИТ секторот.
