ЛЕКОВИТЕ ТРЕБАЛО ДА СТИГНАТ И НАДВОР ОД МАКЕДОНИЈА Тошковски откри дека дел биле за нашиот, дел за пазарот на соседот
Дел од нелегално внесените лекови што беа запленети во полициската акција против организирана криминална група биле наменети за продажба во Македонија, а дел за странски пазар, изјави денеска министерот за внатрешни работи Панче Тошковски.
– Дел од нив бил за македонскиот пазар, дел од нив, согласно првичните информации коишто ги имам, бил за пазар на територија на нашиот сосед – рече Тошковски, одговарајќи на новинарско прашање по дијалог-сесијата на Националната конвенција за Европската унија.
Според министерот, случајот е резултат на подолготрајна истрага и претходни оперативни постапки, во рамките на кои биле одземени мобилни телефони и биле извршени вештачења. Дополнително обезбедените докази, како што рече, довеле до преземање на новите полициски дејствија и разоткривање на криминалната група.
– Добро е што оваа постапка и акција координирано се презема во соработка со Јавното обвинителство, врз основа на претходни постапки коишто сме ги отпочнале и сме ги ефективно разработувале во рамките на телефоните коишто се одземени при првичната акција пред извесно време – изјави Тошковски.
Тој оцени дека со акцијата е спречено понатамошното незаконско дејствување на групата, која, според истрагата, во изминатиот период била вклучена во нелегално внесување различни видови стока во земјава.
– Добро е што е спречена една организирана криминална група којашто во изминатите години делувала на начин којшто делувала надвор од законите, внесувала на територија на државата различни типови на незаконска роба, да се изразам, и добро е што повеќе нема да може да го прави истото – рече министерот.
Тошковски очекува Јавното обвинителство и судот да ги преземат своите надлежности до крај и, како што рече, случајот да добие судска разрешница.
– Се надевам дека Јавното обвинителство и судот во иднина ќе ги преземат сите оние нивни надлежности со цел на крајот да видиме правда во овој случај и да упатиме порака до сите оние коишто мислат дека се недопирливи – истакна Тошковски.
Акцијата во која беше откриена групата беше спроведена од полицијата во координација со Основното јавно обвинителство за гонење на организиран криминал и корупција. Со наредби од Основниот кривичен суд во Скопје беа извршени претреси на повеќе локации во Скопје, Тетово и Гевгелија.
При претресите беа пронајдени и одземени повеќе од 100.000 евра, 16 плочки со златна боја, цигари и тутун без акцизни маркички, поголема количина лекови и суплементи за кои полицијата наведува дека биле нелегално внесени во земјава, како и мобилни телефони и други предмети.
Во акцијата беа лишени од слобода шест лица, додека кривична пријава е поднесена против вкупно осум лица од Македонија и Турција.
Според МВР, првопријавениот М.С. во периодот од 2024 до 2026 година организирал нелегално внесување и складирање на цигари и тутун, како и нивна понатамошна препродажба. Истрагата опфаќа и сомнежи за давање и примање поткуп со цел стоката да поминува преку царинската линија без пријавување и плаќање на давачките.
Покрај акцизната стока, според полицијата, во земјава биле внесувани и лекови и суплементи наменети за продажба. За дел од производите МВР наведува дека биле пуштани во промет без соодветни одобренија, упатства и рецепти, што, според полицијата, создавало ризик по здравјето на луѓето.
Истрагата продолжува, а за натамошниот тек на постапката ќе одлучуваат надлежното обвинителство и судот.
.
Извор: plusinfo.mk
