Лани 356 жени починале од рак на дојка во Македонија, нема термини за мамографија

Алармантни се податоците од Институтот за јавно здравје за лица починати од рак. Лани 356 жени починале од рак на дојка, што речиси во просек е по една жена на ден.

Oд малигна неоплазма на дојка во 2010 година починале 310 жени, а во годините подоцна просекот се движи околу 280 жени годишно. Бројката на починати се зголемува во 2016 година – 338 смртни случаи, а минатата година е пикот – дури 356 жени ја загубиле битката со ракот на дојка, објави Мета.

Во исто време, во земјава е невозможно да се закаже термин за мамографија и за ехо на дојка во јавното здравство. Системот Мој Термин покажува дека во наредните три месеци нема ниту еден термин за жените да направат рутински превентивни прегледи. Месец октомври е месец за развој на свесноста за превенција од ракот на дојка, со цел да се стимулираат жените да вршат редовни прегледи, но тоа системски се покажува како невозможно.