Ладни училници во „Здравко Цветковски“: Учениците пуштени дома порано поради немање парно
Учениците од Средното градежно и гимназиско училиште „Здравко Цветковски“ денеска беа пуштени порано дома поради немање парно, потврдија родители и ученици. Наставата била скратена, а часовите траеле околу триесетина минути.
Дел од родителите побарале објаснување зошто парното не е поправено и побарале интервенција пред почетокот на грејната сезона и за време на распустот.
Директорката не одговорила на повиците и прашањата на новинарите, додека една од раководителките во неформален разговор потврдила дека санацијата е направена и дека се очекува за втора смена училиштето да добие топлинска енергија.
Од Град Скопје потврдија дека проблемот со парното се должи на попуштен дихтон на изменувачот за топлинска енергија.
„Системот во моментов е саниран и е во фаза на тестирање. На дефектот работи фирма во соработка со ЕСМ“, соопштија од Градот.
Во меѓувреме, училиштето може да ги користи клима уредите за затоплување во сите училници додека трае целосната санација на проблемот.
