Каков „филм“ се снима во тетовската стоковна куќа „Центар“?
Тетовската фирма ЛГРОУП, регистрирана за производство на филмови,видеофилмови и телевизиска програма искешира 1,6 милиони евра плус ДДВ за да ја купи тетовската стоковна куќа „Центар“ од тетовски Интерпромет. Интересно е, а и по малку чудно тоа што фирма регистрирана за филмска продукција за која нема достапни финансиски податоци за работењето купи недвижен имот наменет за деловен простор. Од друга страна пак продавачот „Интерпромет“ имаше експлозија на добивката и најави поделба на дивиденда на своите акционери. Тетовската поранешна трговска компанија „Интерпромет“ во континуитет беше предмет на контроверзи во јавноста, а кулминација на слуховите и шпекулациите е таа што остана недокажана, а го посочува Мендух Тачи за „газда во позадина“ на „Интерпромет“
Тетпвски „Интерпромет“ ја има добивката на деценијата! Оваа компанија што се занимава со закуп на недвижен имот објави дека има добивка која надминува 1,1 милиони евра. Највпечатливо е тоа што добивката на „Интерпромет“ е 85 отсто од целиот остварен приход во првите девет месеци годинава. А во споредба со истиот период лани прометот е поголем за 80 пати!!!
Компанијата транспарентно извести на СЕИ НЕТ системот на Берзата дека во целост огромниот раст на профитот е резултат на продажба на нивен недвижен имот односно стоковната куќа „Центар“ во Тетово.
Интересно е тоа што купувач на недвижниот имот е фирма која нема врска со трговија, но е регистрирана за снимање филмови и продукција на ТВ програма. Станува збор за ЛГРОУП од Тетово, чиј сопственик е Ветон Луши. За ова друштво достапните финансиски податоци покажуваат дека лани немало приходи, а завршило со загуба од 80 денари. Фирмата има само еден вработен и е микро субјект основан со влог од 5.000 евра.
Повеќе детали за трансформацијата односно приватизацијата на „Интерпромет“ има на овој линк
Р.Ф.
