Како осомничениот убиец од кумановско останал незабележан од институциите?
Случајот со уапсениот 25-годишник од кумановскиот регион, осомничен за серија тешки кривични дела, предизвика силни реакции во јавноста и во локалната заедница. Сè погласни се прашањата дали можеле навреме да бидат преземени мерки за да се спречат трагедиите, со оглед на тоа што во изминатиот период биле пријавувани смртни случаи на повозрасни жени.
Жители од регионот, во реакции што ги пренесува Телма, тврдат дека осомничениот ѝ бил познат на полицијата, но дека не биле преземени соодветни мерки. Според нив, во еден од случаите постоеле и безбедносни камери на објектот, а лицето било снимено и препознаено, но снимките не биле прифатени како доказ, бидејќи камерите не биле претходно пријавени.
„Полицијата, секогаш кога беше пријавуван, го пушташе, со образложение дека имал доказ дека не е психички добар“, изјавил жител на Старо Нагоричане, како што пренесува Телма.
Осомничениот беше приведен по откривање на безживотно тело на постара жена во нејзиниот дом во Старо Нагоричане. По неговото сослушување, било наредено ексхумирање на уште едно тело на помлада жена, која исто така била пронајдена мртва во својот дом. Истражните органи проверуваат и други слични случаи од лани, кога биле пронајдени мртви жени под неразјаснети околности, за да утврдат дали постои поврзаност.
Телма претходно го објави сведочењето на 86-годишна жена која преживеала напад во својот дом. Нејзиниот син отвори прашања за евентуална поврзаност со други случаи и за можноста некој да стоел зад осомничениот.
„Сепак, мора да се утврди како се случило сè, дали дејствувал сам или некој го водел“, изјави тој, како што пренесува Телма.
Според мештани, осомничениот се движел низ селата со велосипед и живеел во заедница во регионот од мали нозе. Локалните жители велат дека имал отежната комуникација, што дополнително ја комплицира сликата за неговото однесување.
Експертите посочуваат дека ваквите случаи можат да се спречат само со навремена и темелна истрага, како и со координирано постапување на институциите.
Од Министерството за внатрешни работи засега не откриваат детали за тековната истрага и за евентуални пропусти во претходните случаи. Од Обвинителството, според информациите објавени од Телма, најавиле дека ќе се утврдува дали има одговорност кај некого. Неофицијално, се истражуваат повеќе случаи од годинава и од минатата година, кои можат да бидат поврзани со осомничениот.
Инаку, во јавноста се појави фотографија од безбедносна камера на која, според извори блиски до истрагата, е забележан осомничениот за серијата убиства што ја потресоа кумановската околина.
