ИМАЛЕ МУНИЦИЈА ШТО Е ЗАБРАНЕТА ЗА ГРАЃАНИТЕ Истрага против 4 лица за пронајдени дрога и оружје во Брвеница
Основното јавно обвинителство Тетово поведе истражни постапки против 4 лица по претресите во село Брвеница, ори кои беа пронајдени дрога и оружје.
Тројца од нив се осомничени за кривичното дело Неовластено изработување, држење, посредување и тргување со оружје и експлозивни материи од член 396 од Кривичниот законик.
„Кај еден осомничен се пронајдени пиштол со 2 куршуми во рамка и уште 20 куршуми за автоматска пушка. Кај друг осомничен полицијата пронајде 55 куршуми, од кои 53 куршуми боева муниција забранета за граѓаните, додека кај третиот е пронајден пиштол без шаржер“, соопшти Јавното обвинителство.
Четвртото лице кај себе држело 3,15 грама кокаин во моментот на претресот, поради што за него е поведена истрага за делото Неовластено производство и пуштање во промет наркотични дроги, психотропни супстанции и прекурсори од член 215 од Кривичниот законик.
По краткотрајниот 48-часовен притвор за обезбедување докази, јавниот обвинител до судијата на претходна постапка од Основниот суд во Тетово достави предлог за определување мерка притвор за тројца осомничени, додека за еден се предложени мерки на претпазливост.
.
