ХРВАТИТЕ НАВАЛИЈА ВО СРБИЈА: Пазарат во руски маркети
Хрватите поради виските цени дома, купуваат во руските маркети во Србија.
По напливот на хрватски граѓани во продавниците во Словенија и Италија, во последните месеци има вистински прилив во продавниците во Србија, каде Хрватите кои живеат во близина на границата редовно одат на месечни шопинг патувања за да добијат најевтини зделки, пренесува Танјуг.
Како што пренесуваат хрватските медиуми, особено популарни се руските маркети во Белград, познати по ниските цени.
„Иако нивниот изглед е скромен, наликуваат на магацини, купувачите кои ги посетиле, тврдат дека во нив може да се заштеди значителна сума на пари“, пишува хрватскиот весник „Вечерњи лист“.
Весникот пишува дека новинарите тестирале колку намирници може да се купат за 2.000 динари (17 евра) и биле изненадени од цените.
Весникот пишува дека цените во Србија се до трипати пониски отколку во хрватските продавници, поради што за многумина вреди да се помине границата и да се направи поголема набавка, пренесува Танјуг.
Хрватскиот Сабор денеска го донесе Законот за вонредни мерки за контрола на цените, кој со објавување на цените на интернет треба да го заштити стандардот на граѓаните од инфлација и да обезбеди брза реакција на нарушувањата на пазарот. Согласно овој закон, трговците ќе имаат обврска редовно да ги објавуваат и ажурираат цените на сите нивни производи на интернет страниците и на клиентите да им овозможат непречен пристап до дигитални алатки кои нудат можност за споредување на цените во реално време.
