Грција „шампион“ во поскапена храна во јуни

Грција забележа во јуни највисок месечен пораст на цените, 3,3 отсто, во категоријата храна, не само во еврозоната, туку и во цела Европската унија, објавио Катимерини.

Всушност, порастот забележан на цените на храната во јуни 2023 година во однос на мај 2023 година бил дури и поголем од оној во Турција. Според податоците на Грчката статистичка управа (ЕЛСТАТ), месечната промена на цените на храната била 2,10 проценти, што е понизок пораст од оној што го дава Евростат, но подеднакво загрижувачки, бидејќи е втор највисок регистриран по војната во Украина.

Во јуни цените се зголемиле втор месец по ред, спротивно на очекувањата, затоа што енергенсите во меѓувреме поевтинија.

Така, производите од сирење, а особено оние од козјо и овчо млеко, како фета, но и гравиера, сега изгледаат како луксузни производи, со нивните цени, дури и во супермаркет, достигнувајќи 13, односно 15 евра за килограм, додека нема поевтино овошје од едно евро по килограм.

Треба да се напомене дека цената на млекото останува на истото високо ниво како лани и покрај тоа што падна производствената цена.