Гостин во „Пулс“: Мислевме дека е сценска анимација – таванот почна да гори веднаш по активирањето на прскалките
Пред Судот сведочеше и Алберто Миладинов, кој кобната ноќ бил присутен во дискотеката и го снимал настапот кога избувнал пожарот.
Тој изјави дека во 02:32 часот биле активирани прскалките на сцената, момент кој, како што рече, е забележан и на видеото што го снимал.
„Ги снимав пејачите и на крајот од видеото се гледа како дел од таванот почнува да гори. Кога започна рефренот се вклучија прскалките и тогаш се запали дел од плафонот“, сведочеше Миладинов, додавајќи дека според неговото набљудување токму од нив започнал пожарот.
Тој посочи дека во првите моменти присутните не реагирале веднаш, бидејќи мислеле дека станува збор за сценски ефект.
„Останавме на масата и снимавме, мислевме дека е некаква анимација. Дури кога пејачот повика да излеземе надвор, почнавме да се упатуваме кон излезот“, рече сведокот.
Според неговото сведочење, пожарот многу брзо се проширил, а во објектот настанала голема гужва.
„Прво мислевме дека лесно ќе се изгасне и дека забавата ќе продолжи, но огнот брзо се ширеше. Температурата нагло се зголеми, беше многу жешко и загушливо, чадот беше густ и тешко се дишеше“, изјави Миладинов.
Во обид да излезе, успеал да ја помине првата врата, но кај втората почнал да губи свест.
„Некој ме фати и ме извлече надвор. Можеби беа луѓе од обезбедувањето, но не сум сигурен. Подоцна го слушнав гласот на мој другар кој бараше помош“, сведочеше тој.
Миладинов додаде дека две покрупни лица го извлекле од објектот, но нагласи дека не може да препознае никого од присутните во судницата како лица кои му помогнале.
