Газда Деко плачејќи тврди „И ние имаме загинат и повреден, ја носиме истата болка“ – родителите му дофрлија: „Ништо не знаеш!“
„Девет месеци сум затворен во четири ѕида и секој еден ден ја преживувам таа трагична ноќ.“
Со овие зборови и со солзи во очите, првообвинетиот сопственик на „Пулс“, Дејан Јованов – Деко, за првпат проговори пред судот и пред семејствата на загинатите. Тој тврди дека како родител никогаш свесно не би дозволил да фали нешто во објектот каде што излегувале и неговите деца.
„Зарем сериозно мислите дека ако знаев дека фали нешто, не би презел сѐ? Имам пораснато десетина генерации, сите знаат како се грижев за безбедноста“, рече Јованов низ солзи.
Во обид да се поистовети со болката на семејствата, тој откри детал кој досега не беше акцентиран: „И ние во нашата фамилија имаме починато и едно повреден, и затоа ја носиме истата болка што и вие ја носите.“
Сепак, ова не наиде на разбирање кај родителите во публиката, кои револтирано му дофрлија: „Ништо не знаеш!“
„Зошто го гоните Михајло?“ Јованов го искористи своето обраќање и да застане во одбрана на обвинетиот Михаил Јованов (третообвинет во актот). „Едно не ми е јасно, зошто Михајло е обвинет? Тој немаше никакви обврски, ниту допирни точки со работата на клубот. Тој си имаше негова фирма за дистрибуција“, истакна Деко, обидувајќи се да го амнестира од вина.
