Деко бил во заблуда дека работел законски! „Институциите молчеле“, рече одбраната и додаде дека не знаел дека ДНК ќе користи пиротехника
„Дејан не договорил, ниту му било кажано дека има интенција да се користи пиротехника. Тој не знаел за тоа.“
Ова е главната теза на одбраната на првообвинетиот Дејан Јованов. Неговата адвокатка, Ивана Коцевска, пред судскиот совет тврди дека кобната пиротехника била донесена и искористена од музичката група „ДНК“ без знаење на сопственикот.
„Точно е дека и претходно се користела пиротехника, но тоа што јавноста не го знае е дека Дејан секогаш ангажирал пиротехничар кој проверувал дали е безбедно. Овој пат тој не знаел,“ истакна Коцевска.
Таа се осврна и на популарната група, користејќи внимателен, но обвинувачки тон: „Сите ние израснавме со ДНК, сите ги сакавме и ден денес ги сакаме, беа најголеми хуманитарци. Но, за жал, тоа не го побива фактот дека нивната употреба на пиротехника била спротивна на закон.“
„Деко бил во заблуда дека работи законски“ Вториот столб на одбраната е дека Јованов бил уверен оти локалот е безбеден бидејќи институциите молчеле. „Од отворањето на ’Пулс‘, ниту еден службеник не му предочил законски пропуст. Кај Дејан имало заблуда,“ рече адвокатката, додавајќи дека ако постои вина, таа може да биде само од небрежност, а никако со умисла, како што тврди обвинителството.
Одбраната исто така приговори на правната квалификација, сметајќи дека е нелогично ОЈО да го терети Јованов двапати за исто кривично дело (еднаш за пожарот, еднаш за мерките).
