ИЗРАЕЛ Е БЛОКИРАН, МАКЕДОНИЈА ВО СРЦАТА: Рашел Шели Леви-Драмер за откажаните комеморации и растечкиот антисемитизам
Воениот конфликт на Блискиот Исток и целосната блокада на воздушниот сообраќај ги срушија плановите на десетици Израелци со македонско потекло кои требаше да пристигнат во земјава за одбележување на 11-ти март – денот на холокаустот на македонските Евреи.
Рашел Шели Леви-Драмер, која со години е мостот меѓу двете држави, за „Ноќно студио“ на 4TV.mk, ја опишува моменталната состојба во Израел како тензична, но нагласува дека духот на народот е нескршлив.
Поради воената состојба, Израел во моментов е отсечен од светот. Аеродромите се затворени, што директно влијае врз организацијата на комеморативните активности во Битола и Штип.
„Моравме сè да стопираме бидејќи немаме летови. Израел е блокиран, аеродромот е затворен – нема ни влегување ни излегување. Многу ми е жал, бидејќи јас го организирам доаѓањето на голема група Израелци на ‘Маршот на живите’. Сакав да ја видат Македонија, особено сега кога сум горда што во Македонија нема антисемитизам и луѓето се слободни и отворени“, вели Рашел.
Таа додава дека дури и во самиот Израел, настаните на еврејската заедница годинава ќе бидат тивки и скромни, без масовни собири.
Рашел со посебна емоција зборува за гостопримството на македонскиот народ, правејќи паралела меѓу двата менталитети.
„Израелците и Македонците имаат многу заедничко – мили луѓе, друштвени и отворени. Атмосферата на улиците во Македонија е многу позитивна, за разлика од она што се случува во светот каде антисемитизмот расте на сите страни.“
Еден од најсилните моменти во нејзиното сведоштво е описот на упорноста на нејзините сограѓани. И покрај опасноста, илјадници Израелци кои се затекнале надвор од земјата при нападите, прават сè за да се вратат во татковината.
„Околу 150.000 Израелци кои беа излезени на шетање, сега навалуваат на авионите за да се вратат тука. Некој ме праша: ‘Зошто се враќате кога има војна? Сите бегаат од војна’. Но, Израелците се собираат дома. Ние сме упорни и не се даваме, иако е многу непријатно“, објаснува Рашел.
Таа го спомена и неодамнешниот инцидент во Банско, каде бил нападнат Израелец, како пример за загрижувачкиот тренд на нетрпеливост кој се шири низ Европа, што ја прави безбедната средина во Македонија уште повредна за нивната заедница.
