ФОТО Колони возила на излез од Скопје
Ден пред дочекот на Новата година, сликата на излезите од главниот град е очекувана – гужви, колони и забавен сообраќај.
Како што може да се забележи од камерите на Јавното претпријатие за државни патишта, попладнево околу 17:00 часот, значително е зголемена фреквенцијата на возила на клучните патни правци кои водат надвор од Скопје.
Најголем метеж се бележи на наплатната станица Миладиновци, каде што граѓаните масовно патуваат кон источниот дел на државата и кон Куманово. Колоните се долги, а задржувањата се видливи.
Слична е ситуацијата и на западниот крак. На наплатната станица кај Тетово (правец Тетово-Гостивар), сообраќајот се одвива со забавено темпо поради големиот број возила кои се упатуваат кон туристичките центри Маврово и Охрид за претстојните празници.
Зголемена фреквенција има и на Граничниот премин Блаце, каде на излез од Македонија кон Косово се формирани колони од возила.
Од АМСМ препорачуваат прилагодена брзина на движење и трпение, со оглед на тоа што сообраќајниот шпиц се очекува да трае во текот на целата вечер.
