Филмска сцена во Центар: Тинејџер со „Порше“ пресретнат од вооружена група, удрил во камион додека бегал
Вистинска драма се одвивала синоќа, десет минути по полноќ, во строгиот центар на Скопје. Деветнаесетгодишно момче кое управувало луксузен автомобил „Порше“ било мета на вооружен напад, кој завршил со оштетени возила и бегство.
Случајот во полиција го пријавил самиот возач, А.Б. (19) од Скопје, рано утринава во 04:20 часот.
Според пријавата, инцидентот се случил околу 00:10 часот. Додека тинејџерот го управувал своето „Порше“ со скопски таблички, патот ненадејно му го попречиле две други возила.
Од автомобилите излегле неколку лица кои веднаш упатиле закани кон него, вперолувајќи огнено оружје – пиштол. Еден од напаѓачите со рачката од пиштолот удрил по автомобилот на жртвата и го скршил ветробранското стакло.
Во обид да се спаси од напаѓачите и да избега од местото на настанот, А.Б. со своето возило удрил во паркирано товарно возило, по што успеал да го напушти местото.
Од Министерството за внатрешни работи (МВР) потврдуваат дека случајот е пријавен и дека полициски екипи преземаат мерки за идентификување на напаѓачите и целосно расчистување на овој насилен инцидент.
