ЕУ ќе ги искористи приходите од замрзнатите руски средства за помош на Украина
Европската унија би можела да ги искористи приходите од замрзнатите руски средства за да и помогне на Украина во рок од неколку месеци, како дел од планот што вклучува купување оружје за Киев, изјавија лидерите на ЕУ во четвртокот.
Лидерите на 27-те земји-членки на блокот на состанокот во Брисел се договорија да продолжат да работат на планот, кој оваа недела го презентираше Европската комисија.
Овој договор е постигнат по едногодишни преговори за руски имот во вредност од 190 милијарди евра, пренесува „Гардијан“.
Според планот, 90 отсто од вкупните приходи ќе бидат наменети за воени трошоци, а останатите 10 отсто за обнова на Украина по војната.
Претседателката на Европската комисија, Урсула фон дер Лајен, рече дека првата милијарда евра од шемата може да се исплатат веќе на 1 јули.
– Можеме да очекуваме да собереме околу три милијарди евра за 2024 година, а слична сума во наредните години – изјави Фон дер Лајен.
Патот за договорот беше отворен откако првобитната формулација беше променета поради противењето на Унгарија со парите што се користат за вооружување на Украина.
Комисијата процени дека профитот од средствата – различни хартии од вредност на руската централна банка и готовина – може да биде помеѓу 2,5 милијарди евра (2,73 милијарди долари) и 3 милијарди евра годишно.
Германија и Франција изразија силна поддршка за планот.
– Овој приход пред се треба да се искористи за купување на она оружје и муниција што и се потребни на Украина за одбрана – изјави германскиот канцелар Олаф Шолц.
