Ќе се мапираат 150 „црни точки“ нив Скопје – започнува голема акција за сообраќаен ред
Градоначалникот на Скопје, Орце Ѓорѓиевски, на денешната прес-конференција најави сеопфатна акција за подобрување на безбедноста на патиштата низ главниот град. Приоритет на Градот ќе биде обезбедувањето на 150 критични локации, т.н. „црни точки“, каде најчесто се случуваат незгоди или постои опасност за пешаците, особено околу училиштата.
Признавајќи ги поплаките од граѓаните за недостиг на сообраќајни знаци и лоша инфраструктура, Ѓорѓиевски истакна дека веќе е одржан координативен состанок со министерот за внатрешни работи, Панче Тошковски.
Ќе има целосно отстранување на недостатоците на 150-те детектирани критични точки, како и поставување на нова вертикална и хоризонтална сигнализација, светлосни уреди и подобрување на прегледноста.
Оваа година ЈП „Улици и патишта“ ќе инвестира сериозни средства во воспоставување на т.н. паметен зелен бран.
Градоначалникот ја поздрави измената во законот која конечно овозможува полесно поставување на вештачки испакнатини на патиштата (лежечки полицајци). Оваа мерка ќе биде клучна за смирување на сообраќајот во населените места каде брзината е најчест ризик.
„Агендата ни е јасна – овие 150 точки мора да бидат обезбедени за да влијаеме на намалување на бројот на сообраќајни незгоди и, што е најважно, да спречиме нови жртви. Град Скопје и ‘Улици и патишта’ се носители на активностите, но ќе работиме во тесна координација со МВР и Министерството за транспорт“, дециден е Ѓорѓиевски.
Оваа иницијатива доаѓа како одговор на барањата на родителите за поголема безбедност пред училишните зони, каде честопати возачите немаат јасна информација за дозволената брзина на движење.
