Двајца загинати по протестите против нафтениот гигант во Колумбија, 79 полицајци држени како заложници
Еден полицаец и еден цивил беа убиени за време на протестите во колумбискиот оддел Какета, а 79 службеници за спроведување на законот и девет работници на нафтените полиња беа земени како заложници, објави Ројтерс.
Насилството избувна откако демонстрантите нападнаа и запалија нафтено поле во сопственост на компанијата „Емералд енерџи“ во руралниот дел на општината Сан Висенте дел Кагуан, јави колумбиската полиција.
Претставниците на локалните заедници и домородното население го блокираа пристапот до локацијата. Тие бараат Емералд енерџи, подружница на кинеската државна компанија Синохем, да ги поправи патиштата во регионот.
Според полицијата, во немирите може да бидат вклучени сепаратистите на ФАРК кои го отфрлаат мировниот договор од 2016 година.
Претседателот Густаво Петро нареди формирање на заедничка комисија од официјални претставници од министерствата за одбрана и внатрешни работи, како и од вооружените сили, да бидат испратени во регионот за да се стави крај на насилството.
Во Колумбија протестите редовно избувнуваат во близина на нафтените полиња и рудници. На овој начин, локалните жители вршат притисок врз компаниите да изградат инфраструктура која вклучува училишта и патишта, забележува Ројтерс.
