Дурмиши: Одредени тројца членови кои ќе пишуваат казни ако не се почитува Законот за нефер трговски практики
Министерот за економија Бесар Дурмиши пред медиумите денеска рече дека Комисијата за заштита на конкуренција веќе има проширен состав и дека тројца нови членови ќе работат специјално на спроведување и одредување санкции за оние кои го прекршуваат Законот за нефер трговски практики.
Со овој закон, кој опфаќа околу 2.500 производи, се очекува намалување на цените во маркетите преку уредување на односите помеѓу трговците и добавувачите, но според министерот Дурмиши оваа година нема да има казнување, туку тоа ќе започне од следната година.
– Постапката во Собранието е изгласана. Сега таа Комисија наместо два ќе има пет члена и тројца од нив ќе бидат сектор кој ќе се занимава само со прекршоците. Вие знаете дека до крајот на годината им дадовме период на добавувачите и трговците да ги усогласат договорите, односно цените, и по Нова година ќе се пишуваат казни. Овој период ќе има само опомени и советувања. Овој трочлен сектор на Комисијата за заштита на конкуренција ќе ги разгледува сите договори помеѓу добавувачите и трговците. Овој модел веќе одлично функционира во Хрватска, рече Дурмиши.
