Дисциплинска постапка за полицајците што не даваа да се крене непрописно паркираното порше во Дебар Маало
На двајцата полициски службеници, кои работат во Одделението за лично обезбедување на Претседателот и кои спречуваа нивни колега и пајак служба на Општина Центар да подигнат неправилно паркирано возило во Дебар Маало им се закануваат дисциплински постапки.
Како што информирааат од Министерството за внатрешни работи, со полициските службеници Т.Д. и И.С., кои вечерта кога граѓани повикаа пајак служба за да отстраи возило кое со часови блокира велосипедска патека, тврделе дека тоа е полициско возило и инсистирале да не се подигнува, е извршен службен разговор и е констатирано дека сториле потешко прекршување на работниот ред и дисциплина, заради што ќе биде поднесен предлог за утврдување на нивната дисциплинска одговорност.
Од МВР велат дека Одделот за внатрешна контрола, криминалистички истраги и професионални стандарди ја прегледал видео снимката направена од граѓани, која кружи на социјалните мрежи и на која се гледа како група граѓани бараат од полициски службеник С.Н дојден со пајак на ПОЦ да го подигне возилото „порше каен“ со скопски регистарски ознаки, поради тоа што било паркирано на велосипедска патека, односно на коловоз.
„На местото на настанот, од угостителски објект излегле две лица кои се легитимирале како полициски службеници и изјавиле дека возилото е службено. Полицискиот службеник С.Н. им наредил да го отстранат возилото и да го паркираат на соодветно место, по што влегол во кабината на пајак возилото со цел да провери дали возилото навистина е службено. Откако утврдил дека возилото не е службено и дека сè уште не е отстрането, на вработените од ЈП Јавни паркиралишта им дал наредба да го подигнат возилото, по што истото било пренесено во депото“, информираат од МВР.
Таму било констатирано дека сторител на прекршокот е С.К. (76) од Скопје, а сопственик на возилото е М.Т. (48) од Скопје.
