Дебаклот комплетиран: Работнички без победа ги заврши квалификациите

По поразите од Рапид и Сабах, тимот од Градски парк денеска загуби и од Донар Гронинген, тим кој во текот на летото се наоѓаше на работ на егзистенција. Холанѓаните во Скопје победија со 65-62, а не е изговор ни тоа што натпреварот немаше резултатско значење бидејќи ниедна од двете екипи немаше шанса за првото место во групата.

Загрижувачка неефикасност беше забележана во првото полувреме во кое Работнички постигна само 25 поени и на пауза замина со негатива од седум разлика. Ништо подобро не беше ниту во продолжение, па дури во последната четвртина се разбудија домашните кошаркари и во неа постигнаа безмалку половина од вкупниот број поени (27). Сепак, будењето беше задоцнето бидејќи Донар на седум минути пред крајот имаше предност од 11 поени (50-39).

Трајс и Џелетовиќ беа единствени со двоцифрен број поени, Американецот постигна 12, а Србинот 11. Работнички сега може да се насочи кон обврските во домашното првенство бидејќи веќе в сабота го очекува дербито против Пелистер во Битола.