Црна Гора не доби помош од ЕУ затоа што проектите биле „преуранети и неподобни“
Црна Гора не доби финансиска поддршка од Европската комисија (ЕК) како дел од последниот финансиски пакет за Западен Балкан од 2,1 милијарди евра, бидејќи Владата доставила несоодветни и предвремени проекти, соопштија за „Вијести“ од ЕК.
На 30 јуни, ЕК започна нов финансиски пакет за поддршка на 14 водечки инвестициски проекти за Западен Балкан, а на поддржаната листа нема ниту еден од Црна Гора.
Како што претходно најави ЕК, новиот пакет вклучува проекти од областа на транспортот, енергетиката, животната средина, човечкиот капитал и поддршка на приватниот сектор во вредност од 2,1 милијарди евра.
Тоа е петти инвестициски пакет во рамките на Економскиот и инвестицискиот план на ЕУ за Западен Балкан, вреден 39 милијарди евра инвестиции и европски грантови.
На прашањето на „Вијести“ зошто Црна Гора не е вклучена во новиот пакет и дали има поднесено проекти за него, портпаролката на ЕК Ана Писонеро Хернандез одговори дека поднесените предлози се оценети како предвремени или неподобни.
„Црна Гора поднесе инвестициски проекти во областа на енергијата, животната средина и транспортот што WBIF ги оцени како предвремени за финансирање или неподобни за финансирање“, рече таа денеска.
Во ЕК, како што појасни, сметаат дека Црна Гора ќе продолжи со подготовката и дека овие инвестициски предлози ќе бидат зрели за потенцијално повторно доставување на следните повици.
