Четиринаесетгодишниот Илија Гигов од Велес доби благодарница од полицијата за покажаната чесност
Четиринаесетгодишниот Илија Гигов од Велес стана пример за чесност откако пронајде и врати штедна книшка во која имало 46.000 денари. За неговата несебична постапка, Секторот за внатрешни работи (СВР) Велес му додели официјална благодарница.
Младиот Илија ги пронашол парите во центарот на Велес, пред експозитура на една банка, додека се враќал од училиште. Во штедната книшка имало точно 23 банкноти во апоени од по 2.000 денари. По пронаоѓањето, тој веднаш ги известил своите родители, кои без двоумење го пријавиле случајот во полиција, по што средствата му биле вратени на сопственикот.
На 7 Мај, Денот на македонската полиција, началникот на СВР Велес, Бране Паласков, му врачи благодарница на Илија, истакнувајќи го неговиот карактер како инспирација за заедницата.
„Илија Гигов со својата постапка покажа дека најважни одлики во животот на еден човек се чесноста, одговорноста и добрината. Неговиот чин претставува инспирација за сите нас“, изјави началникот Паласков при доделувањето на признанието.
