Цеков: Европа нема да ни го исчисти ѓубрето, ниту ќе ни ги казни корумпираните директори
„Уставните измени не се решение за трагедиите и депониите дома. Промената мора да почне од нас, а не да чекаме влез во ЕУ за да станеме правна држава“, порача независниот пратеник Миле Цеков, повикувајќи на национално единство наместо партиски поделби.
Независниот пратеник Миле Цеков во емисијата „Ноќно студио“ на 4ТВ ги демантираше сите шпекулации во врска со неговиот став за уставните измени, нагласувајќи дека неговиот наратив останува непроменет и цврсто заснован на заштита на националните интереси.
Цеков подвлече дека неговата визија за Македонија е полноправно членство во Европската Унија, но под јасно дефинирани услови кои не подлежат на преговори.
„Сакам мојата земја да биде дел од ЕУ, но со јасен и чист македонски јазик, идентитет и култура. Тие теми не се за преговарање – тие се темелот на нашето постоење. Мандатот и легитимитетот од граѓаните ги добив токму на оваа теза и за тоа ќе се борам“, изјави тој.
Пратеникот ја отфрли можноста еден пратеник да биде пресуден за вака крупни државни прашања. Тој упати критика до политичките лидери за недостатокот на зрелост.
Најсилниот акцент Цеков го стави на фактот дека уставните измени станаа параван за домашните неуспеси. Тој предупреди дека членството во ЕУ не е магично стапче кое ќе ги реши внатрешните системски проблеми.
„Премногу се фокусираме на уставните измени. Ниту Европа, ниту соседите не ни се виновни за трагедиите што ни се случуваат, ниту за ѓубрето и депониите низ државата. Тие нема да дојдат да ни го исчистат дворот. Не ни е виновна ЕУ за корумпираните директори, судии и обвинители – за тоа сме виновни самите“, дециден е Цеков.
Според него, илузорно е да се верува дека самиот влез во Унијата преку ноќ ќе не промени како општество. Промената, смета тој, мора да започне веднаш и внатре во државата, преку одговорност и суштински реформи.
