Бојан Маричиќ: ЕУ по втор пат прашува за „Бехтел и Енка“
Вицепремиерот за евроинтеграции Бојан Маричиќ во емисијата „Само интервју“ на Канал 5 рече дека Европската унија преку Брисел отворила втор циклус на прашања за договорот со конзорциумот „Бехтел и Енка“ за изградба на автопатите од Коридор 8 и 10д.
Договорот не е транспарентно објавен за јавноста, само во редактирана верзија е испратен во Државната комисија за спречување на корупција, а во меѓувреме беа донесени пет спорни законски измени по скратена постапка, што предизвика загриженост кај Европската Унија.
– Ние им објаснивме писмено и усмено повеќе пати. Тие побараа нови одговори во втор круг на допишување. Во текот на скринингот им доставив информација, сега втор пат праќаат, а ние ќе им го доставиме одговорот, рече вицепремиерот во емисијата.
Освен Бехтел и Енка како американско-турски конзорциум, тој рече дека државата има и европски стратешки инвеститори кои, како што рече тој, треба да започнат или започнале со своите проекти во земјата.
– Во договорот има формули, методи, начин на работа, за кој Бехтел и Енка не сака да се објавуваат поради деловна тајна. Од друга страна, парите се јавни и познато е се за што ќе биде платено, наведе Маричиќ.
