БАРААТ РАБОТА, АМА ДОЦНАТ НА ИНТЕРВЈУ: Кои се најчестите грешки кои младите ги прават?

Од агенциите за
посредување при вработување, кои ги поврзуваат кандидатите за работа и
компаниите, објаснуваат дека една од најчестите грешки кои младите ги прават е
доцнењето на интервју. Се случува поради метеж во сообраќајот да доцнат 10 или
15 минути, но ако е повеќе од тоа, кандидатот остава лош впечаток и шансите
дека ќе ја добие работата се мали. Во поглед на облекувањето за
интервјуто за работа, од агенциите велат дека немаат некои посериозни
забелешки.

„Од нашето искуство, ние сме нови на пазарот, но сме поминале многу
процеси, масовни, за високи позиции и сето тоа е индивидуално. Ако прашувате за
младите, има лежерност во нивниот однос, знаат да доцнат на интервјуата. Доцнат
10-15 минути, а ако е повеќе или воопшто кандидатот не се појави, значи апликантот не е
заинтересиран за работата. Ние сакаме да ја развиеме свесноста кај нив дека
компаниите нема да го толерираат тоа. Има 20 отсто од кратките биографии кои се
напишани онака како проформа, а другите се уредни. Едно е кога ќе добиеме CV,
a поразлично е кога имаме разговор.
Во однос на облекувањето, зависно од позиција до позиција, начинот на
облекување најчесто се почитува. Ако е за повисоки позиции, за во банка, знаат
да дојдат во костум, додека кај младите има лежерност, но сепак се пристојни. Не
можеме да кажеме дека се тоа грешки, можеби кандидатите се неискусни, поминале само
2-3 интервјуа претходно. Треба да се охрабрат да одат почесто на интервјуа, ќе
научат многу за комуникацијата и како подобро „да ги продадат“ своите вештини“,
вели Марија Ваневски, регрутер од Тривити агенција од Скопје.

Им советуваат на
младите одењето на разговори за работа да не го гледаат како залудно изгубено
време, туку да учат од своите грешки и во иднина подобро да се претстават. Од
друга агенција во помал град, велат дека кај младите има доза на несериозност,
додека постарите се поодговорни.

„Несериозноста е
лоша работа. Може кандидатот и да не се појави или оди во фирмата на разговор и
си заминува брзо, не ни дослушува до крај кои се условите, оти има опции за во
странство. Постарите кандидати се посериозни, на крај се сведува на тоа кој
колку има потреба од наоѓање на работа и избор“, додаваат од агенција за
посредување при вработување во внатрешноста.

Експертите
советуваат кандидатите за работа да не доцнат на разговор, да бидат соодветно
облечени, да ги персираат луѓето со кои разговараат, да покажат флексибилност и
ентузијазам за работа, да не говорат лошо за претходните работодавачи, да не
покажат преценување, но и потценување во однос на платата, да бидат спремни да
се усовршуваат, да бидат реални во однос на своите квалификации и можности. Воедно,
треба да бидат информирани за компанијата во која аплицирале да работат, во
спротивно тоа ќе се смета за минус.

Сања Атанасовска

foto freepik.com

/faktor.mk