Армијата ќе се засилува со нови 300 припадници

Министерството за одбрана се подготвува за нов бран вработувања во Армијата. Наскоро ќе биде објавен конкурс за прием на 300 нови војници, најави министерот за одбрана Владо Мисајловски.

Во гостување во емисијата „Тема на денот“ на Сител телевизија, министерот појасни дека огласот ќе биде распишан веднаш по добивањето на потребната документација од Министерство за финансии, со цел постапката за прием да започне во пролетниот рок.

– Кога ќе стигнат од финансиите сите потребни документи, ќе ги објавиме конкурсите, се надевам веќе во пролетниот рок што доаѓа, што повеќе луѓе да влезат, да се натпреваруваат меѓу себе и да бидат дел од Министерството за одбрана, односно од Армијата, изјави Мисајловски.

Тој посочи дека интерес кај младите има, нагласувајќи дека офицерскиот кадар и специјалните единици се на високо ниво на обученост. Со зголемувањето на буџетот за одбрана, како што рече, ќе се создадат услови и за подобрување на статусот и примањата на припадниците на Армијата.

Според него, од јануари минатата година сите вработени во Министерството добиле 30 проценти зголемување на платите, а со натамошното зголемување на буџетот ќе се работи и на дополнително подобрување на платниот статус.

Министерот најави и решение со кое би се овозможило задржување на војниците кои ќе наполнат 45 години, со цел да продолжат да придонесуваат во Армијата.

– Има иницијативи, што најважно е како да се задржат сите војници што ќе наполнат 45 години. Мислам дека набрзо ќе има решение со кое ќе бидат сите задоволени, како да ги задржиме сите војници во Армијата, за да можат дополнително да дадат придонес, изјави Мисајловски.