Алармантни податоци: Малолетници сѐ почесто експериментираат со дрога и алкохол

Експериментирањето со наркотични средства, особено со марихуана и синтетички дроги, станува секојдневие за значителен дел од малолетниците во општина Гевгелија. Ова беше истакнато на денешната седница на Советот на Општината, каде беа презентирани извештаи за состојбата со наркоманијата кај младите.

Центарот за социјална работа во Гевгелија предупредува дека официјалната бројка на евидентирани лица не ја отсликува реалната слика на теренот. Институцијата води евиденција само за оние кои веќе развиле тешка зависност, додека бројот на деца кои повремено користат дрога е непознат.

Според психијатарот Сашко Цветковиќ, љубопитноста и потребата за припадност во одредено друштво се клучните фактори зошто тинејџерите посегнуваат по дрога. Најкритичен е периодот меѓу 12-тата и 16-тата година, кога марихуаната речиси секогаш е „влезната врата“ кон потешки зависности подоцна во животот.

„Во болниците овие лица најчесто доаѓаат кога се веќе полнолетни, но нивната историја со наркотици секогаш започнува многу порано, уште во раното тинејџерство“, вели Цветковиќ.

Директорот на Психијатриската болница во Негорци, Сашко Стојиловски, посочи на сериозен проблем во системот за лекување:

Во изминатата година, во болницата во Негорци се лекувале 22 наркозависници, од кои половината се млади лица на возраст од 20 до 34 години. Само во 2025 година се регистрирани 11 нови пациенти, од кои четворица се жители на Гевгелија, но надлежните се децидни – бројката на оние кои не се јавуваат на лекување е далеку поголема и расте од година во година.