Јакимовски: Македонија е заглавена во популизам – претседателот мора да биде коректив, а не послушник на власта
Во гостувањето на „4ТВ“, лидерот на ГРОМ, Стевче Јакимовски, се осврна на мотивите за неговата претседателска кандидатура, посочувајќи дека државата се наоѓа во опасна стагнација поради недостаток на визија и заробеност во партиски популизам.
Против популизмот во надворешната политика
Јакимовски смета дека функцијата претседател на државата е клучна за надворешната политика, која во моментов е жртва на теснопартиски интереси и застарени методи.
„Надворешната политика ни е оптоварена од една партија и нејзината заробеност во минатото. Популизмот можеби поминува дома, но во надворешната политика тој прави директна штета на државата. Кога претседателот и власта се од иста партија, немате никаков коректив. Власта не е подготвена да се преиспита, дури и кога политиките се штетни за граѓаните“, истакна Јакимовски.
Според него, патот кон Европската Унија е претворен во празна реторика. Тој упати критика дека државата само декларативно се залага за ЕУ, додека во пракса не прави ништо за да го подготви стопанството или да ги подобри стандардите.
Јакимовски предлага ако патот кон ЕУ е блокиран, државата да не чека во лимбо, туку активно да бара економски партнери кои ќе инвестираат и ќе отвораат трговски патеки.
Тој алармира за „тотална деиндустријализација“ и дебакл во земјоделството.
„Трошиме милијарди на земјоделство, а неговото учество во БДП падна од 13% на само 5%“.
Најзагрижувачкиот тренд, според Јакимовски, е масовното иселување на веќе ситуирани и материјално обезбедени луѓе. Тие не бегаат од сиромаштија, туку од нефункционалниот систем.
„Луѓето ја напуштаат Македонија заради лошото функционирање на правната држава, администрацијата, полицијата и политиката. Ова што денес му се случува на Карпош е типичен пример за лошо функционирање на политиката. Во развиена држава, ако градоначалникот не може или не сака да работи, веднаш се дава оставка и се оди на избори. Кај нас, партискиот интерес е секогаш пред интересот на граѓаните“, дециден е Јакимовски.
Тој заклучи дека претседателот мора да биде гласот на разумот кој ќе бара излез за стопанството и подобар живот за граѓаните, наместо да биде само нем набљудувач на системското пропаѓање.
