ЛДП утре повторно поднесува закон за една изборна единица и отворени листи
Љубен Аврамовски, портпаролот на Либерално-демократската партија (ЛДП), најави дека утре во Собранието повторно ќе биде поднесен предлог-закон за воведување на отворени листи и една изборна единица. Според Аврамовски, оваа иницијатива е долгогодишна заложба на ЛДП, која има за цел да донесе праведен и транспарентен изборен модел што ќе овозможи еднаков глас за сите граѓани и директен избор на претставници.
„Ова е клучен чекор кон изборен систем кој ќе им даде вистинска моќ на граѓаните да ги избираат своите претставници“, истакна Аврамовски.
Тој додаде дека ЛДП го поддржува и вклучувањето на предлозите од граѓанскиот сектор за независни листи, со надеж дека овој пат предлогот ќе добие поширока поддршка и ќе придонесе кон посилна демократија во земјата. Аврамовски ги повика сите политички партии и граѓанските организации да се приклучат во отворен дијалог и заеднички да работат на усвојување на современ изборен систем.
