Џафери вели дека не е спорна професионалноста на Меџити и Алиу, но според закон не може да има два опозициски субјекта во Владата

Техничкиот премиер Талат Џафери денеска во Собранието, образложувајќи го поднесеното барање за разрешување на овие двајца министри од Алијанса за Албанците, порача дека не станува збор за нивната стручност и професионалност кон што имам исклучителна почит, но според законот, не може да има два опозициски субјекта во состав на Владата.

Според него, тоа е основната причина зошто е предложено разрешувањето на министрите за здравство и за информатичко општество и администрација, Фатмир Меџити и Азир Алиу.

„Сакам да напоменам дека предлогот за разрешување на министрите не се однесува на нивната професионална подготвеност за која имам посебна почит, туку, според законот, не може да има два опозициски субјекта во состав на Владата и тоа е основната причина зашто беше предложено разрешувањето. Овие двајца министри се изјаснија дека ќе го поддржат статусот на претседателот на партијата дека ќе делуваат како опозиција, а според законот, не може да има два опозициски субјекта во состав на Владата и тоа е основната причина зашто се предлага разрешувањето. Согласно Уставот, ова е мое право, а одлуката ја носи Парламенетот“, истакна Џафери.