Адеми: Партијата се подготвува на внатрепартиски избори, не на оставки
Демократската унија за интеграција (ДУИ) ќе го одржи својот партиски конгрес најдоцна до 20 декември, одлучи Централното претседателство на партијата на денешната седница во Мала Речица, свикана од лидерот Али Ахмети.
Потпретседателот и портпарол на ДУИ, Арбер Адеми, изјави дека на седницата се разгледувале тековните политички случувања во државата, состојбата во коалицијата и внатрепартиските процеси.
„Дискутиравме за сите политички и внатрешни развои во ДУИ, како и за состојбата во коалицијата. Имајќи предвид дека истечен е рокот за партиски конгрес и соочувајќи се со актуелните политички случувања, е донесена одлука конгресот да се одржи до 20 декември,“ изјави Адеми.
На новинарско прашање за евентуални оставки по изборните резултати, Адеми нагласи дека тоа не било тема на дискусија, бидејќи партијата се подготвува за внатрепартиски избори.
„Претседателот Ахмети вчера истакна дека пораката ја примивме. На национално ниво, сепак, остануваме најголема политичка опција со над 23.000 гласа повеќе. Во некои општини резултатите се помалку поволни, но ДУИ влегува во процес на обнова, поради што се организира и партиски конгрес до 20 декември,“ додаде Адеми.
Исто така, е донесена одлука за формирање организациски одбор за подготовка на конгресот, кој ќе брои осум членови на партијата.
