450 пациенти можеби биле изложени на ХИВ и хепатитис во болница во САД
Речиси 450 луѓе можеби биле изложени на инфекција со ХИВ, хепатитис Б и Ц во болница во Салем во Масачусетс, САД, објавија американските медиуми. Како причина се наведува неправилната администрација на интравенски лекови.
Потенцијалната зараза опфаќа период од приближно две години. Станува збор за пациенти на кои им била потребна ендоскопија, процедура во која лекарите користат мала камера која се вметнува во телото на човекот за да бараат разни болести.
Болницата стана свесна за можноста за инфекција на почетокот на годината и ординацијата за ендоскопија веднаш беше корегирана, велат од болницата.
„Искрено им се извинуваме на оние кои беа погодени“, рекоа тие.
Можноста некој од пациентите да бил навистина заразен со болестите е исклучително мала и до денес никој не пријавил дека има такви инфекции по ендоскопија во болница.
Поранешните пациенти моментално се тестираат за ХИВ и за двата типа на хепатитис. Медицинската установа ги предупреди за потенцијалната инфекција преку својот онлајн портал.
Од извештаите не е јасно како точно се случило загадувањето.
И покрај строгите медицински протоколи кои постојат ширум светот, пациентите се уште одвреме-навреме се изложени на разни болести. Во 2018 година, повеќе од 3.000 луѓе повторно беа изложени на ризик од хепатитис и ХИВ кога беа користени ‘рѓосани медицински инструменти во болница во Њу Џерси.
Во 2008 година, речиси 63.000 пациенти беа изложени на потенцијален ризик од заразување со хепатитис Ц поради лошите практики во две клиники за ендоскопија во Лас Вегас.
