222 преживеани од Пулс имаат изгореници, оштетување на видот, инхалаторни повреди или критичко оштетување на белите дробови

Во катастрофалниот пожар кој го зафати угостителскиот објект „Клуб Пулс“ во Кочани, покрај 63-цата загинати посетители, дури 222 лица претрпеле повреди со различна тежина. Обвинителството еден по еден во судница ги читаше повредите на сите 222 лица.

Според официјалните податоци од актот кој го поседува 4NEWS.mk, 157 лица се здобиле со тешки телесни повреди, а меѓу нив има дури 20 деца. Дополнително, со телесни повреди се здобиле уште 65 лица, од кои 3 се деца.

Медицинските вештачења и протоколи покажуваат дека најголемиот дел од жртвите се соочиле со страотни изгореници и тешки оштетувања на респираторниот систем.

Покрај директното дејство на пожарот, огромниот број на посетители во објектот и паничното бегање кон единствената излезна врата резултирале со масовно туркање и паѓање. Ова стампедо предизвикало сериозни механички повреди.

Овие детални судско-медицински наоди ќе бидат клучни во доказната постапка.