1.000 денари за пензионерите во март – ниту една пензија нема да биде под 15.000 денари
Премиерот Христијан Мицкоски потврди дека во март годинава пензионерите ќе добијат ново покачување на пензиите од 1.000 денари. Тој останува на ставот дека линеарното усогласување е најправедниот модел бидејќи со него директно се намалува јазот меѓу примањата и се ублажува сиромаштијата кај најранливата категорија граѓани.
Според планот на Владата, до април 2026 година вкупното линеарно зголемување на пензиите ќе достигне 7.000 денари. Мицкоски истакна дека пред почетокот на овој процес дури 150.000 пензионери преживувале со примања од 10 до 12 илјади денари. Со новите покачувања, минималните пензии веќе нема да бидат под 15.000 денари, туку ќе се движат во износ од 17 до 19 илјади денари.
Во однос на правните предизвици, премиерот одби да ги коментира постапките пред Уставниот суд, кој неодамна не успеа да донесе одлука за оспорениот закон поради поделеност на гласовите меѓу судиите. Претседателот на Судот, Дарко Костадиновски, појасни дека резултатот од гласањето бил 4-4, па конечната одлука ќе се чека по комплетирањето на судискиот состав со нови членови.
Законот за линеарно зголемување беше изгласан во Собранието во јули минатата година. Со неговата примена, пензионерите веќе добија две покачувања од по 2.500 денари, како и 1.000 денари во септември 2025 година, а претстојната илјадарка во март е продолжение на ветената динамика за подобрување на стандардот.
