Звезда се закани, но Олимпијакос го доби братското дерби

Братското, „црвено-бело“ дерби му припадна на грчкиот тим со 88-83 иако во финишот гостите се заканија дека можат да дојдат до изненадувачка победа. На три минути пред крајот на натпреварот, Олимпијакос водеше сп 80-66, а само една минута подоцна, на семафорот стоеше 80-75. Сепак, како и на натпреварот против Барселона минатата недела, Звезда направи неколку неверојатни грешки за таков тим кои на крајот скапо ја чинеа.

Во главна улога сега беше Недовиќ кој прво загуби топка во контранапад, а потоа, при 82-78 за Олимпијакос, доби техничка грешка затоа што ја газеше аут-линијата при изведување топка на противнички играч. Домаќините го искористија тоа, постигнаа три поени во еден напад и отидоа на недостижни 85-78.

Звезда останува без победа на гостински терен сезонава и вечерва го доживеа петтиот пораз. Олимпијакос се искачи на седмото место по двете победи до кои дојде и покрај проблемите со повреди на неколку важни играчи.

РЕЗУЛТАТИ
Макаби – Фенербахче 78-73
Олимпијакос – Црвена Звезда 88-83
Милано – Анадолу Ефес 92-76
Реал – Монако 91-73