Железницата ги издаде складиштата за дизел во Лисиче

АД „Железници Транспорт“ издало под закуп две од трите складишта за дизел во депото што се наоѓа помеѓу Лисиче и Кисела Вода. Ова е единствениот голем капацитет што го поседува акционерското друштво за железнички транспорт во земјата.

Од трите складишта, од кои секое од нив има капацитет за илјада тони дизел, издадени се две на фирмата за големопродажба и малопродажба на горива „Супертрејд“. Станува збор за единствените поголеми капацитети кои ги има друштвото во државна сопственост. 

Според веб-страницата на Желзеници Транспорт, депото од 2.000 тони во Трубарево е вон употреба, а има уште неколку испостави во внатрешноста на земјата но само со зафатнина од 50 тони.

Возниот ред во железничкиот сообраќај во последно време е редуциран особено со тоа што ретко кога има дизел патничка гарнитура која е во возна состојба. „Железници Транспорт“ има свои дизел моторни возови и дизел локомотиви од разни серии, но нема јавна евиденција колку од нив ги исполнуваат условите за сообраќај. Претпријатието има и електро-локомотиви и електромоторни возови.

Според објавениот возен ред за 2024, возови нема од Скопје кон Кичево, Кочани и Табановци, а ќе нема ниту меѓународен патнички сообраќај од македонскиот главен град. Во него е впишано дека од скопската железничка станица ќе поаѓаат само по осум воза дневно кон Битола, Гевгелија и Велес. 

Железничкиот транспорт има проблеми и со исплаќањето на фактурите за електрична енергија. На крајот од минатата година, преку купување на акции, Владата на акционерското друштво за железнички транспорт му одобри 16 милиони евра вонредни пари за да расчистува со долговите,

Последен пат друштвото набави 3,5 милиони литри дизел и 0,5 милиони литри мазут во јуни 2022 за сума од околу 3 милиони евра. 

Претпријатието во последните шест години промени десетина директори. Последен е назначен Зули Демири, кадар од Алијанса за Албанците.

А.К.