„Жалгирис е фаворит, има поголемо искуство – со реми би биле (пре)задоволни!“
Струга ТЛ вторпат во својот излез во Европа доаѓа на Балтикот, пред две години летонска Јеглава ги елиминираше со вкупни 2-5 (1-4, 1-1), но сега пред себе македонскиот првак ќе има многу сериозен ривал, иако Литванија не е фудбалски крем, но Жалгирис лани успеа да дојде до групна фаза во Конференциската лига и тоа откако мина две кола во Лигата на шампионите, а за малку испадна од Лидогорец во борбата за Лига Европа во плејофот.
„Ние сме дебитанти во овие квалификации за ЛШ и Жалгирис има многу поголемо искуство од нас, зашто во ова натпреварување играат со години, лани го елиминираа за нас добро познатиот Балкани, па потоа и шведски Малме, што е јасен сигнал дека има огромен квалитет“, вели Шпетим Дуро, тренерот на стружани.
Но, Струга не се предава, а утре со реми би биле презадоволни, зашто реваншот за осум дена во Скопје би го решавал патникот.
„Ние сме млад клуб и голема привилегија да играме во овие квалификации. Јас реков дека искуството за вакви натпреварувања има големо значење, но во фудбалот не секогаш фаворитите победувале. Јасно е дека победникот ќе се решава во два меча, така да ние би биле задоволни со реми“, додаде Дуро.
Струга ТЛ попладнево на „ЛФФ Арената“ го одработи последниот тренинг пред утрешниот меч закажан за 18 часот.
